ბავშვის ძილი

​ძილი ისეთივე აუცილებელია ბავშვისთვის, როგორც სწორი კვება და სუფთა ჰაერი. ბავშვისთვის მხოლოდ ღამის ძილი საკმარისი არაა, მას დღისითაც უნდა ეძინოს. რაც უფრო პატარაა ბავშვი,მით უფრო მეტ ხანს სძინავს. ახალშობილს სძინავს თითქმის მთელი დღე-ღამე, დაახლოებით 20 სთ. შემდგომში გაცილებით მეტ ხანს ფხიზლობს და ნაკლები სძინავს. 2-3 თვის ბავშვს, ყოველი კვების წინ  2-1,5 სთ სძინავს, 3-დან 10 თვემდე – დღეში 3ჯერ და 10 თვიდან -1,5 წლამდე — 2 ჯერ დღეში. 2 თვიდან ბავშვი უნდა მივაჩვიოთ ყოველთვის ერთიდაიგივე, გარკვეულ დროს დაძინებას.

თუ ბავშვი სწორად იკვებება, რეგულარულად სეირნობს, სისუფთავეშია, ფხიზლობის დროს სათამაშოებითაა დაკავებული, თუ მას მოხერხებული საწოლი აქვს, _ ის ყოველთვის სწრაფად, ადვილად დაიძინებს და მშვიდად ეძინება.
დღისით ზაფხულშიც და ზამთარშიც ბავშვი გარეთ,ჰაერზე უნდა დავაძინოთ.  სუფთა ჰაერზე მას ყოველთვის კარგად სძინავს. ბავშვს სრულ სიჩუმესა და სიბნელეში ძილს ნუ მიაჩვევთ. თუმცა უნდა გვახსოვდეს, რომ თუ ოთახში სადაც ბავშვს სძინავს, ძალიან ხმაურობენ, ან ანთია კაშკაშა სინათლე, ბავშვი მშვიდად ვერ დაიძინებს და მისი ნერვული სისტემა ვერ დაისვენებს.

პირველ კვირებში ძალიან ადვილია მივაჩვიოთ ბავშვი მთელი ღამე მშვიდად ძილს. ამისათვის ყოველთვის გარკვეულ დროს უნდა ვაჭამოთ და დავაძინოთ, მოხერხებულ საწოლში, კარგად განიავებულ ოთახში.

თუმცა არსებობს სხვა მიდგომაც — ბავშვის კვებისა ძილის თავისუფალი რეჟიმი. მაგრამ, გამოცდილებიდან გამომდინარე შეიძლება ვთქვათ, რომ ასეთი ცუდად ორგანიზებული ბავშვები უფრო მეტს ჭირვეულობენ და დედა ვერ ასწრებს ვერც სახლის საქმეების გაკეთებას, ვერც დასვენებას.

თუ ბავშვს მშვიდად არ სძინავს, შფოთავს — უნდა ვიპოვოთ ამის მიზეზი და აღმოვფხვრათ. ზოგჯერ ბავშვს, სამსახურიდან დაბრუნებული უფროსები ზედმეტად ართობენ, ოთახში ხმაურია, ჩახუთულობა, თამბაქოს ბოლია, ყველა ეს ნაკლი უნდა გამოსწორდეს.

ბავშვს ძილის წინ მშვიდი გარემო უნდა შევუქმნათ, გამოვაღოთ სარკმელი, ხშირად კარგად მოქმედებს ბანაობა, რის შემდეგაც ბავშვს როგორც წესი 5-6 სთ გადაბმულად სძინავს.

გაზიარება