ღამის ენურეზი ბავშვებში

ბავშვის მოვლა და პედიატრია - ვრცლად

​ღამის ენურეზი ანუ ღამით შარდის შეუკავებლობა საკმაოდ მნიშვნელოვანი, მაგრამ კეთილთვისებიანი და ასაკდამოკიდებული პრობლემაა.

დამნაშავე ამ ამბავში მცირე ზომის შარდის ბუშტია, რომელიც ვერ იტევს მთელი ღამის განმავლობაში დაგროვილ შარდს, ამასთან ამ პრობლემის მქონე პატარებს ძალიან ღრმად ძინავთ და სავსე შარდის ბუშტი არ აღვიძებთ. როგორც წესი პრობლემა ოჯახურია, აუცილებლად მოიძიებთ ნათესავებს, რომელთაც ბავშვობაში ეს პრობლემა აწუხებდათ. ღამის ენურეზზე ვსაუბრობთ მაშინ, თუ ბავშვი უკვე 6 წლისაა და პრობლემა მაინც გრძელდება.

ენურეზის სიხშირე 6 წლის ასაკში შეადგენს დაახლოებით 15-20%-ს, 10 წლისათვის 10%-ს, 15 წლისათვის 1%-ზე ნაკლებს, ხოლო 18 წლისათვის პრაქტიკულად აღარ გვხვდება; დაახლოებით 2-ჯერ უფრო ხშირად აღენიშნებათ ბიჭებს, ვიდრე გოგონებს.

რჩევები მშობლებს:

• შეუზღუდეთ სითხე დაძინებამდე მინიმუმ 2 საათით ადრე.
• ვახშამი ეცადეთ ჩვეულებრივზე ოდნავ მარილიანი იყოს.
• დაძინებამდე ზედიზედ რამოდენიმეჯერ მოაშარდინეთ.
• ღამით გააღვიძეთ და მოაშარდინეთ.
• შეიძინეთ “მაღვიძარა-ქამარი”, რომელიც პატარას გამოღვიძებაში დაეხმარება.
• არ ჩააცვათ პამპერსი (უფრო მშვიდად იქნება და არ ეცდება გაიღვიძოს).
• დაასაჩუქრეთ და შეაქეთ პატარა ყოველი “მშრალი” ღამის შემდეგ
• არ დასაჯოთ პატარა “სველი” ღამის შემდეგ, მას თქვენი მხარდაჭერა და სიყვარული ჭირდება.
• გახსოვდეთ მედიკამენტური მკურნალობა ეფექტურია შემთხვევათა მხოლოდ 25%-ში და რადგან უფრო დიდი შანსი არსებობს იმისა, რომ საკმაოდ სერიოზული ქიმიური პრეპარატი მას არ უშველის ნუ იჩქარებთ მის გამოყენებას.

სპეციალისტს უნდა მიმართოთ თუ:

• შარდვისას აღენიშნება წვა ან ტკივილი 
• შარდის ნაკადი წყვეტილია 
• შარდის შეუკავებლობა დაიწყო დღისითაც 
• ენურეზი დაეწყო 6 თვიანი ,,მშრალი” პერიოდის შემდეგ
• პატარა 6 წლის გახდა და პრობლემა გრძელდება 
• 3 თვე შეასრულეთ ეს რეკომენდაციები და შედეგი არ არის 

ბავშვის მოვლა და პედიატრია - ვრცლად

გაზიარება