პრემენსტრუალური სინდრომი

გინეკოლოგია - ვრცლად

პრემენსტრუალური სინდრომი წარმოადგენს ნეგატიური სიმპტომების რთულ კომპლექსს, რომელიც ქალს მენსტრუაციის წინა დღეებში აწუხებს.

​მენსტრუაციის დაწყებამდე 7 – 10 დღით ადრე აღინიშნება თავის ტკივილი, უძილობა, შრომისუუნარობა, დეპრესია, გაღიზიანებადობა, წონაში მატება, ზოგჯერ ტაქიკარდია, არითმიები, კარდიალგია, მოხრჩობის შეგრძნება, სუბფებრილიტეტი. მენსტრუაციის დაწყებისთანავე ეს სიმპტომები მცირდება და ქრება.

პრემენსტრუალური სინდრომი აქვს რეპროდუქციული ასაკის ქალების 50-80%-ს, უმრავლესობას - ძალზე იოლი ფორმით, ისე, რომ ექიმის ჩარევას არ საჭიროებს, მაგრამ უნდა ვიცოდეთ, რომ დროთა განმავლობაში პრემენსტრუალური სინდრომმა შესაძლოა პროგრესირება განიცადოს. იგი უმთავრესად 20-40 წლის ქალებს აწუხებთ. 

პრემენსტრუალური სინდრომი 150-მდე სიმპტომს აერთიანებს, ახალგაზრდა ქალების უმრავლესობა აღნიშნავს, რომ მენსტრუაციის წინა დღეებში ხშირად განიცდის არა მარტო ფიზიკურ, არამედ ემოციურ-ფსიქოლოგიურ დისკომფორტს. ბევრი უჩივის უსაფუძვლო აგრესიის შეტევებს, არაადეკვატურ ქცევით რეაქციას, უმიზეზო ტირილს, ხასიათის ხშირ ცვალებადობას.

პრემენსტრუალური სინდრომის ოთხი ყველაზე გავრცელებული ფორმაა:

შეშუპებითი ფორმა

ახასიათებს სარძევე ჯირკვლების გაუხეშება, შესივება და და ტკივილი, სახის, ფეხებისა და ხელის მტევნების შეშუპება, ოფლიანობა. პმს-ის ამ ფორმის დროს მკვეთრად არის გამოხატული სუნებისადმი ზემგრძნობელობა. მოსალოდნელია გემოვნების შეცვლაც.

ნერვულ-ფსიქოლოგიური ფორმა

ვლინდება სისუსტით, უმიზეზო ტირილით, დეპრესიით ან, პირიქით, გადამეტებული, აუხსნელი გაღიზიანებითა აგრესიით. ეს უკანასკნელი, წესისამებრ, ახალგაზრდა ქალებს აღენიშნებათ, შედარებით ასაკოვანთათვის კი დეპრესიული მდგომარეობაა დამახასიათებელი.

ცეფალგიური ფორმა

ახასიათებს თავის ტკივილი, გულისრევა, ზოგჯერ - ღებინება, თავბრუხვევა. პმს-ის ამ ფორმით დაავადებულთა დაახლოებით მესამედს აღენიშნება გულის არეში ტკივილი და ფსიქოლოგიური დათრგუნულობა. გარდა ამისა, იცვლება ორგანიზმში კალციუმის რაოდენობა, რამაც შეიძლება ძვლების დასუსტება გამოიწვიოს.

კრიზისული ფორმა

თავს იჩენს ადრენალინური კრიზის ნიშნები. სახელდობრ, გულმკერდის არეში შეიგრძნობა ზეწოლა, რასაც თან ახლავს გულისცემის შეგრძნება, კიდურების დაბუჟება და გაცივება. მოსალოდნელია ხშირი და ჭარბი შარდვა. ამგვარი კრიზის დროს ზოგს სიკვდილის შიში ეუფლება, რაც ნეგატიურად აისახება ფსიქიკურ და ემოციურ მდგომარეობაზე. პმს-ის ეს ფორმა ექიმის ჩარევას საჭიროებს. 

გინეკოლოგია - ვრცლად

გაზიარება