რა იწვევს ვაგინალურ კრუნჩხვებს

დავით (ბუკა) კობეშავიძე
ექიმი მეან-გინეკოლოგი, მედიცინის აკადემიური დოქტორი

ვაგინალური კრუნჩხვები ან სპაზმები გამოიხატება საშოს კუნთების მძლავრი და მტკივნეული შეკუმშვებით, რომელიც ნორმად ითვლება მენსტრუაციის დროს, ხოლო მენსტრუაციის გარეშე აღნიშნულ კრუნჩხვას ან სპაზმს შეიძლება ეწოდოს სამედიცინო პათოლოგია.


ზემოთაღნიშნული პრობლემების მიზეზები და ფაქტორები მრავალმხრივია;

მიზანშეწონილია თითოეული მათგანის ცალცალკე გარჩევა; მაგალითად. საშოსმხრივი ინფექციები როგორებიცაა: ბაქტერიული ვაგინოზი, სქესობრივი გზით გადამდები ინფექციები და საშარდე გზების ინფექიები ერთ-ერთი იმ ფაქტორთაგანია რომელთაც შეუძლიათ ვაგინალური კრუნჩხვის ან სპაზმის გამოწვევა;

ხსენებული პათოლოგია ასევე თავს იჩენს დისპარეუნიის- მტკივნეული სქესობრივი აქტის დროსაც რომელიც ტიპიურად მენსტრუაციის დროს განვითარებულ საშოს კრუნჩხვებს ჰგავს, მაგრამ ემატება მწვავე ტკივილი ქალის მენჯის ღრუში;

დისპარეუნიის მრავალი მიზეზია ცნობილი მაგალითად საშოს ინფექციური და ანთებითი პროცესები, ასევე ანამნეზში საშოს ან საშვილოსნოს ქირურგიული მკურნალობა და ა.შ.

საერთოდ ცალკე სასაუბრო საკითხი და საკმაოდ ვრცელი თემა გახლავთ ძალზედ გავრცელებული დაავადება -ენდომეტრიოზი; ეს არის პროცესი როდესაც საშვილოსნოს შიდა მფარავი გარსის - ენდომეტრიუმის (რომლის დესქვამაცია - ჩამოფცქვნა ხდება თვეში ერთხელ და სისხლის სახით გამოიდევნება საშვილოსნოდან - მენსტრუაციის სახელით არის ცნობილი) მსგავსი უჯრედების განვითარება ხდება არა საშვილოსნოს შიგნით, არამედ გარეთ, მენჯის ღრუში, რომელნიც სისხლმდენ უჯრედებად იქცევიან ხოლმე მენსტრუაციისას, მაგრამ ჩვეული მენსტრუაციიდან განსხვავებით როდესაც დესქვამირებული ენდომეტრიუმის უჯრედები სისხლის მეშვეობით საშვილოსნოდან გარეთ გამოიდევნებიან, ისინი მუცლის ღრუში რჩებიან შესაბამისად ასეთი მენსტრუაცია საკმაოდ მტკივნეული გახლავთ.

ვაგინალური კრუნჩხვები ასევე შეიძლება დაკავშირებული იყოს მენჯის ღრუს ანთებით დაავადებებთან რომლის დროსაც აღნიშნული დაავადებების დროს გამოწვეული ინფექციები იწვევენ საშოს ქსოვილის ანთებით პროცესს, რომლის სიმპტომები შეიძლება შემდეგნაირად იყოს გამოხატული:

• სისხლდენები მენსტრუაციებს შორის შუალედში;
  
• ყრუ ტკივილები მუცლის ქვემო არეში;
  
• სქესობრივი კონტაქტის დროს ტკივილი;
  
• უჩვეულო სუნიანი გამონადენი საშოდან.

როდესაც მანდილოსანი უჩივის ვაგინალურ კრუნჩხვებს ან სპაზმებს, რომელსაც თან ერთვის შემდეგი ხასიათის სიმპტომები:

• სუნიანი ან უსუნო გამონადენი საშოდან
• მუდმივი შებერილობის შეგრძნება
• ძლიერი სისხლდენა საშოდან
• მწვავე ტკივილი მუცლის ღრუში
• ტკივილი სქესობრივი აქტის დროს
• შარდის შეუკავებლობა
• მოშარდვის მუდმივი სურვილი

აუცილებელია ექიმთან კონსულტაციაზე ვიზიტი.

გაზიარება