დავით კობეშავიძე კლინიკის ხელმძღვანელებს მიმართავს

უამრავი ძნელბედობა ახსოვს ჩვენ ქვეყანას - ბუნებრივი კატაკლიზმებიდან დაწყებული ომებით და ათასი უბედურებებით დამთავრებული, მაგრამ ყოველთვის უმკლავდებოდა ყველაფერს; მეტიც, მამულიც შემოგვრჩა, ენაც და სარწმუნოებაც!

ქართველი კაცის ბევრ სასიკეთო თვისებებთან ერთად, სწორედ მოყვასის გვერდში დგომამ და სიყვარულმა, საკუთარი ,,მეს“ დათმობამ გადაგვარჩინა;

საოცარი მაგალითები გვაქვს როგორც შორეულ, ასევე ახლო წარსულში.

რატომ დამჭირდა ამის შეხსენება? - მოგახსენებთ;

დღეს ძალიან გვიჭირს სრულიად საქართველოს. რას არ აკეთებს ჩვენი მთავრობა, მაგრამ მტერი ვერაგია, უკან დახევა არ სურს.

და აი, ასეთი საშიშროების დროს, როცა ჩვენი  ქვეყანა უმძიმესი გამოწვევის წინაშე დგას, როდესაც ობიექტური მიზეზების გამო ჩვენი თანამოქალაქეების უდიდესი ნაწილი უმუშევარი და შესაბამისად, უშემოსავლოდ დარჩა - ზოგიერთი, არ მომერიდება ამ სიტყვის, ქორვაჭარი ამ მდგომარეობაზე აპელირებით ცდილობს ხელის მოთბობას.

აქაოდა ლარი გაუფასურდაო, ყველაფერს უმოწყალოდ უმატებს ფასს; მათ შორის, მედიკამენტებს, სახარჯ და საოპერაციო მასალებს, სადეზინფექიო ხსნარებს;

ეს მაშინ, როცა აღნიშნულ კრიტიკულ დღეებში ჩვენი კლინიკების უმეტესობა ან უფასოდ, ან დიდი ფასდაკლებით  ემსახურებიან ჩვენ მოსახლეობას;

გრცხვენოდეთ, თქვენ პატრიოტები არ ხართ, ფულს გამოკიდებული მედროვეები ბრძანდებით; 
​ფუი, თქვენს კაცობას !!!

მოგმართავთ, პატივცემულო კლინიკის ხელმძღვანელებო, გავერთიანდეთ და ხმა ავიმაღლოთ ამ უმსგავსობის წინააღმდეგ.
 
დავით კობეშავიძე
,,იმედის კლინიკის" დირექტორი

გაზიარება